【邱奕懷】評論

仙拼仙，拼死猴齊天   比喻兩方拚鬥，卻禍延無辜的第三者

【劉泓甫】評論

在台灣諺語中有一句話說「仙拼仙、拼死猴齊天」，意思很清楚，指的是當雙方高手拼戰不休的情況下，最後會受著拖累的總是無辜的第三者；所以講「仙拼仙」，最後就會「拼死猴齊天」。逐家嘛攏知影，這所講的猴齊天就是西遊記內底的齊天大聖孫悟空，所以講到孫悟空，一方面因為伊大鬧天庭，參仙班人馬有寡仔因緣，嘸擱，尚重要的理由應該只是押韻、順嘴而已。講到「仙拼仙、拼死猴齊天」，講實在話，咱尋常百姓家，嘛真愛看這寡仔列入仙班的政治人物，會當佇逐家注目中來辯論教育政策，因為教育是百年種樹的大工程，過去的政府推動教育改革，效果是烏魯木齊、亂遭遭，所衍生的問題是千千萬萬，根本無法度通來改善。咱真希望佇辯論中會當來瞭解候選人的教育方針是啥貨的教育政策、教育改革欲按怎來推動，是愈乎咱的子弟行一條啥款的教育路。嘸擱，我是比較厚操煩的人，總驚講「仙拼仙」，拼到最後死的猶原是咱的子兒孫，無因無故受著拖累的猴齊天。若是照我的想法，教育問題是咱逐家攏愛關心的代誌，咱逐家愛親像教育團體「樂學連」，家己企起來推動咱所愛的教育方式，絕對使放乎「仙拼仙」，拼死咱的猴齊天。