閱讀理解A：
        一下到五月五，隨時鼻會著人咧煠肉粽的芳味，佇進前定定聽會著「未食五日節粽，破裘毋甘放」這句俗語，咧勸人天氣多變化，五日節過才有算熱人，佇彼進前甘願做衫奴才，毋通欲穿揣無路來，電視新聞報氣象的記者嘛會搬俗語出來鬥，予咱那看電視那學俗語罔趣味，母語嘛才袂拍交落無彩去。
       我逐冬食著頭一粒五日節粽，毋是想著破裘仔愛放、毋放，我是「未食五日節粽，毋知鄉愁遐爾重」。五日節的一禮拜前，阮二姊用這馬足利便閣有冷凍設備的『宅急便』，寄一捾家己縛的肉粽分我食。接著彼暝，我攏會隨提一粒退冰，用電鍋炊來食。下港的粽一下窒入喙，隨少年三十幾歲，若像倒轉去我國中彼陣，那耍水那洗粽箬的日子。熱天做彼款會當沐水清涼的工課，有夠讚。後來，阿公、阿媽過身，無人縛予阮食，阮三个姊妹仔就家己款料、炒料到縛粽、煠粽，舞甲有影有一跡。
       彼擺粽箬仝款是派我來洗，是毋免技術、愛有耐心的工課，毋過，我閣有縛著誠濟粒肉粽。會曉縛粽表示已經大漢矣。大姊款的料比阿媽的較豐沛，毋知伊去佗位學來的，毋但秫米愛用油蔥仔酥炒過，蝦米、香菇、半精白的三層佮鰇魚用紅蔥仔頭芡芳了，閣濫漢藥房拆轉來的五香炒甲芳貢貢、貢貢芳；閣有規搣的塗豆、規粒的鹹卵仁佮貴參參的栗子。縛家己食是會用得，若欲賣定著算袂和。那縛粽著那煠粽，一鼎愛煠點半鐘。我這个洗粽箬、耍水、上清涼的細漢的，就加一項上燒熱的工課──顧火。
       有影比以前較好食，

、芳芳芳，這就是正港用煠的、好料的下港粽。二姊寄來的就是這味，佮北部粽用粽箬包油飯用炊的無仝。食著下港粽，才知影阮姊妹仔的感情捾規摠，縛了比粽較絚，嘛較知影我思念故鄉的感情遐爾重。

【題組】73. 根據文章，是按怎作者甘願「做衫奴才」？下底佗一个選項上適當？
(A)天氣喝變就變，較艱苦嘛著共衫紮咧
(B)伊的下跤手人無夠頂真，作者甘願家己紮一領衫
(C)衫足貴的，愛拍拚趁錢、粒積才會使買，為衫儉錢，若衫的奴才
(D)天氣變來變去，有使用人共你款衫，才甘願出門