（二）傳統漢醫所講究是大自然佮人體和諧的關係，人體的五臟六腑佮大自然五種無仝的元素，是相對應的。｢木、火、土、金、水｣這五種元素的特色，所對應的是咱人的五臟：肝屬木，心屬火，脾屬土，肺屬金，腎屬水，這款｢肝、心、脾、肺、腎｣佮｢木、火、土、金、水｣相對應的觀點，就是漢醫所講的五行。

五行的概念，毋但予漢醫運用佇對五臟的理解，更加是提來解釋季節佮色水之間的對應關係。以漢醫觀點，一年毋是干焦有四季爾爾，｢春、夏、長夏、秋、冬｣，對季節分類的幼路，所對應的是這个世界無仝的色彩。春天若到，枯木發穎，目睭所看，攏是鮮沢的青，｢春、夏、長夏、秋、冬｣每一个季節所對應的色水就是: ｢青、紅、黃、白、烏｣。佇五行當中，春天屬木，肝木若勇壯，目睭就四序，所以｢黃帝內經｣有提起，若欲養肝，著愛趁春天。

五行補五臟，無仝的季節運用無仝色水的食材，來調養身體，嘛是漢醫強調的養生方法。｢藥補不如食補｣，用著時的食食來強身健體，比用高貴的藥材來燖補閣較適合咱現代人。親像春天加食一寡菜蔬，予目睭金、目睭明，這，就是漢醫對應五行的運作，來調養人體健康的理路。 
漢醫對五行的觀點，自古以來對應大自然的運作，所留落來的經驗佮實證，咱現代人，若會當了解五行的基本概念，配合季節來調節無仝色水的食食，對健康來講，會使講是誠有幫贊的。
【題組】48. 根據內文，下面佗一个選項是正確的？
(A)春天食青菜，會當養肺經
(B)熱人食紅菜，會當養肝血
(C)秋天食龍眼，會當補精神
(D)寒人食烏豆，會當顧腰子